Al-Inshiqaq

جب آسمان پھٹ جائے گا۔

اور اپنے رب کے حکم کی تعمیل کرے گا اور اسے یہی زیب دیتا ہے۔

اور جب زمین کو پھیلا دیا جائے گا۔

اور وہ نکال باہر کرے گی جو کچھ اس کے اندر تھا اور خالی ہوجائے گی۔

اور وہ بھی اپنے رب کے حکم کی تعمیل کرے گی اور اسے یہی زیب دیتا ہے۔

اے انسان ! تو مشقت پر مشقت برداشت کرتے جا رہا ہے اپنے رب کی طرف پھر تو اس سے ملنے والا ہے۔

تو جس کو دیا جائے گا اس کا اعمال نامہ داہنے ہاتھ میں۔

تو اس سے لیا جائے گا بہت ہی آسان حساب۔

اور وہ لوٹے گا اپنے گھر والوں کی طرف شاداں وفرحاں۔

اور جس کو دیا جائے گا اس کا اعمالنامہ اس کی پیٹھ کے پیچھے سے۔

تو اب وہ موت کی طلب کرے گا۔

لیکن وہ داخل ہوگا جہنم میں۔

یقینا (دنیا میں) وہ اپنے اہل و عیال میں بہت خوش و خرم تھا۔

اسے گمان ہوگیا تھا کہ کبھی لوٹ کر نہیں آنا ہے۔

کیوں نہیں ! یقینا اس کا رب تو اسے خوب دیکھ رہا تھا۔

تو نہیں مجھے قسم ہے شام کی سرخی کی۔

اور رات کی اور ان چیزوں کی جن کو وہ سمیٹے ہوئے ہے۔

اور چاند کی جب وہ پورا ہوجاتا ہے۔

(اسی طرح) تم لازماً چڑھو گے درجہ بدرجہ۔

تو انہیں کیا ہوگیا ہے کہ یہ ایمان نہیں لاتے ؟

اور جب انہیں قرآن پڑھ کر سنایا جاتا ہے تو یہ سجدہ نہیں کرتے ؟

بلکہ یہ کافر تو جھٹلا رہے ہیں۔

اور اللہ کو خوب معلوم ہے کہ یہ لوگ (اپنے اندر) کیا بھرے ہوئے ہیں۔

تو (اے نبی ﷺ !) ان کو بشارت دے دیجیے دردناک عذاب کی۔

البتہ جو لوگ ایمان لائے اور جنہوں نے نیک عمل کیے ان کے لیے کبھی نہ ختم ہونے والا اجر ہے۔