Al-Qiyamah

نہیں ! میں قسم کھاتا ہوں قیامت کے دن کی۔

اور نہیں ! میں قسم کھاتا ہوں نفس لوامہ کی۔

کیا انسان یہ گمان کرتا ہے کہ ہم اس کی ہڈیاں جمع نہیں کرسکیں گے ؟

کیوں نہیں ! ہم تو پوری طرح قادر ہیں اس پر بھی کہ ہم اس کی ایک ایک پور درست کردیں۔

بلکہ انسان تو یہ چاہتا ہے کہ فسق و فجور آگے بھی جاری رکھے۔

وہ پوچھتا ہے : کب آئے گا قیامت کا دن ؟

پس جب نگاہیں چندھیا جائیں گی۔

اور چاند بےنور ہوجائے گا۔

اور سورج اور چاند یکجا کردیے جائیں گے۔

اس دن انسان کہے گا : کہاں ہے کوئی بھاگ جانے کی جگہ ؟

(کہا جائے گا :) ہرگز نہیں کوئی جائے پناہ نہیں ہے۔

اس روز تمہارے ربّ ہی کے حضور میں جا کر کھڑے ہونا ہے۔

جتلا دیا جائے گا انسان کو اس دن جو کچھ اس نے آگے بھیجا ہوگا اور جو کچھ پیچھے چھوڑا ہوگا۔

بلکہ انسان تو اپنے نفس کے احوال پر خود ہی خوب بصیرت رکھتا ہے۔

اور چاہے وہ کتنے ہی بہانے پیش کرے۔

آپ اس (قرآن) کے ساتھ اپنی زبان کو تیزی سے حرکت نہ دیں۔

اسے جمع کرنا اور پڑھوا دینا ہمارے ذمہ ہے۔

پھر جب ہم اسے پڑھوا دیں تو آپ اس کی قراءت کی پیروی کیجیے۔

پھر ہمارے ہی ذمے ہے اس کو واضح کردینا بھی۔

ہرگز نہیں ! اصل بات یہ ہے کہ تم لوگ جلدی ملنے والی چیز (یعنی دنیا) سے محبت کرتے ہو۔

اور تم آخرت کو چھوڑ دیتے ہو۔

بہت سے چہرے اس دن تروتازہ ہوں گے۔

اپنے رب کی طرف دیکھ رہے ہوں گے۔

اور بہت سے چہرے اس روز اترے ہوئے ہوں گے۔

ان کو یقین ہوگا کہ اب ان کے ساتھ کمرتوڑ سلوک ہونے و الا ہے۔

ہرگز نہیں ! جب کہ جان آکر پھنس جاتی ہے ہنسلیوں میں۔

اور کہا جاتا ہے کہ ہے کوئی جھاڑ پھونک کرنے والا ؟

اور وہ سمجھ جاتا ہے کہ اب جدائی کی گھڑی آن پہنچی ہے۔

اور پنڈلی پنڈلی سے لپٹ جاتی ہے۔

اس دن تو تیرے رب ہی کی طرف دھکیلے جانا ہے۔

پس اس نے نہ تو تصدیق کی اور نہ نماز پڑھی۔

بلکہ اس نے جھٹلادیا اور پیٹھ موڑ لی۔

پھر چل دیا اپنے گھر والوں کے پاس اکڑتا ہوا۔

افسوس ہے تجھ پر افسوس ہے !

پھر افسوس ہے تجھ پر افسوس ہے !

کیا انسان یہ سمجھتا ہے کہ اسے یوں ہی چھوڑ دیا جائے گا ؟

کیا وہ حقیر پانی کی ایک بوند نہیں تھا جو (رحم مادر میں) ٹپکائی جاتی ہے ؟

پھر وہ ایک علقہ بنا پھر اللہ نے اس کو بنایا اور اس کے اعضاء درست کیے۔

پھر اسی سے اس نے دو زوج بنائے نر اور مادہ۔

تو کیا وہ اس پر قادر نہیں کہ ُ مردوں کو زندہ کردے ؟