Al-Ma'arij

مانگا ایک مانگنے والے نے ایک ایسا عذاب جو واقع ہونے والا ہو

کافروں کے لیے جس کو کوئی ٹال نہ سکے گا۔

(وہ عذاب اپنے وقت پر آئے گا) اس اللہ کی طرف سے جو بہت بلند درجات والا ہے۔

چڑھتے ہیں فرشتے اور روح اس کی جانب ایک دن میں جس کی مقدار پچاس ہزار برس ہے۔

تو آپ ﷺ بڑی خوبصورتی سے صبر کیجیے۔

یہ لوگ تو اس (عذاب) کو دور سمجھ رہے ہیں

اور ہم اسے نہایت قریب دیکھ رہے ہیں۔

جس دن آسمان ہوجائے گا جیسے پگھلا ہوا تانبا۔

اور پہاڑ ایسے ہوجائیں گے جیسے دھنکی ہوئی روئی (یا رنگی ہوئی اُون)۔

اور کوئی دوست کسی دوسرے دوست کا حال نہیں پوچھے گا۔

وہ سب انہیں دکھائے جائیں گے۔ اس روز مجرم چاہے گا کہ کاش وہ اس دن کے عذاب سے بچنے کے لیے فدیے میں دے دے اپنے بیٹوں کو

اور اپنی بیوی کو اور اپنے بھائی کو

اور اپنے کنبے کو جو اسے پناہ دیتا تھا

اور روئے زمین پر بسنے والے تمام انسانوں کو پھر یہ (فدیہ) اس کو بچا لے !

ہرگز نہیں ! اب تو یہ بھڑکتی ہوئی آگ ہی ہے۔

جو کلیجوں کو کھینچ لے گی۔

وہ پکارے گی ہر اس شخص کو جس نے پیٹھ موڑ لی تھی اور رُخ پھیرلیا تھا

اور جو مال جمع کرتا رہا پھر اسے سینت سینت کر رکھتا رہا۔

یقینا انسان پیدا کیا گیا ہے تھڑدلا۔

جب اسے کوئی تکلیف پہنچتی ہے تو بہت گھبرا جانے والا ہے۔

اور جب اسے بھلائی ملتی ہے تو بہت بخیل بن جاتا ہے۔

سوائے نمازیوں کے۔

جو اپنی نمازوں پر مداومت کرتے ہیں۔

اور وہ جن کے اموال میں معین حق ہے

مانگنے والے کا اور محروم کا۔

اور جو فیصلے کے دن کی تصدیق کرتے ہیں۔

اور جو اپنے رب کے عذاب سے لرزاں و ترساں رہتے ہیں۔

یقینا ان کے رب کا عذاب ایسا نہیں ہے کہ کوئی اس سے نڈرہو جائے۔

اور جو اپنی شرم گاہوں کی حفاظت کرنے والے ہیں۔

سوائے اپنی بیویوں یا اپنی لونڈیوں کے تو ان لوگوں پر کوئی ملامت نہیں۔

تو جو کوئی بھی اس کے علاوہ کچھ چاہے گا تو وہی لوگ حد سے بڑھنے والے ہیں۔

اور وہ جو اپنی امانتوں اور اپنے عہد کا پاس کرنے والے ہیں۔

اور وہ جو اپنی گواہیوں پر قائم رہنے والے ہیں۔

اور وہ لوگ کہ جو اپنی نماز کی محافظت کرتے ہیں۔

یہی لوگ ہیں جو جنتوں میں ہوں گے اور وہاں ان کا اعزازو اکرام ہوگا۔

تو (اے نبی ﷺ !) ان کافروں کو کیا ہوگیا ہے کہ وہ آپ کی طرف دوڑے چلے آتے ہیں۔

دائیں اور بائیں سے غول در غول۔

کیا ان میں سے ہر ایک واقعتا اس کا خواہش مند ہے کہ وہ نعمت بھری جنت میں داخل کیا جائے گا ؟

ہرگز نہیں ! ہم نے ان کو پیدا کیا ہے اس چیز سے جس کو وہ جانتے ہیں۔

تو نہیں ! قسم ہے مجھے مشرقوں اور مغربوں کے ربّ کی

اس پر کہ ہم ان کو ہٹاکر ان سے بہتر لوگ لے آئیں اور (اس معاملے میں) ہم ہارے ہوئے نہیں ہیں۔

تو (اے نبی ﷺ !) آپ چھوڑ دیجیے انہیں یہ لگے رہیں بےہودہ باتوں اور کھیل کود میں یہاں تک کہ یہ ملاقات کریں اپنے اس دن سے جس کا ان سے وعدہ کیا جا رہا ہے۔

جس دن وہ نکلیں گے اپنی قبروں سے دوڑتے ہوئے جیسے کہ وہ مقرر نشانوں کی طرف بھاگے جا رہے ہوں۔

ان کی نگاہیں زمین میں گڑی ہوئی ہوں گی ذلت ان پر چھائی ہوئی ہوگی۔ یہ ہے وہ دن جس کا ان سے وعدہ کیا جاتا تھا۔